Il-Vjaġġi Enċiklopediċi tiegħi fuq Campus FM bdew u issa jmiss it-tieni u t-tielet wieħed.
Vjaġġi Enċiklopediċi ma’ Toni Sant fuq Campus FM
Kelli raġun ngħid dejjem li x-xandir li għamilt fl-aħħar 20 sena permezz tal-internet kien sempliċi kontinwazzjoni ta’ dak kollu li jiena nipproduċi u nippreżenta regolarment għar-radju fis-snin ta’ qabel. Tant hu hekk li ħadd ħlief jien ma ta każ wisq il-fatt li jiena erġajt qed inxandar regolarment fuq ir-radju issa wara dawn is-snin kollha nieqes minn fuq il-frekwenzi tal-FM f’Malta.
Fit-tieni u t-tielet programm fis-sensiela ta’ Vjaġġi Enċiklopediċi niltaqgħu ma’ Tony Micallef u Neville Borg, li huwa l-President u s-Segretarju, rispettivament, tal-għaqda voluntarja Wikimedia Community Malta. Huma jitkellmu l-enċikolpediji fid-dar tagħhom, qabel jgħaddu biex jispjegaw aktar dwar din l-għaqda li tippromwovi l-ħidma tal-Wikimedia f’Malta, inkluż il-Wikipedija (i.e. il-Wikipedia bil-Malti) permezz ta’ sensiela ta’ attivitajiet li ilhom jiġu organizzati f’Malta f’dawn l-aħħar 5 snin.
Fit-tieni parti, fejn nimirħu fl-odisseja enċiklopedjana li twassalna biex naraw artikli tal-Wikipedija dwar suġġetti vajri, spiċċajna fil-lokalità tal-Gżira ma’ Tony, u fil-profil dwar l-artista Isabelle Borg ma’ Neville.
Il-programmi huma disponibbli online wara li jixxandru bħal-lum it-Tlieta fil-4:30pm, jew fir-ripetizzjoni ta’ nhar il-Ħamis fit-3pm.
Dis-sensiela hija produzzjoni tal-M3P Foundation għal Campus FM.
Illum bdew il-Vjaġġi Enċiklopediċi tiegħi fuq Campus FM.
Vjaġġi Enċiklopediċi ma’ Toni Sant fuq Campus FM
Dan ifisser li wara madwar 20 sena jiena erġajt qed nipproduċi u nippreżenta sensiela ta’ programmi regolari għar-radju.
Propjament ma waqaftx inxandar matul dawn is-snin kollha, naturalment. Sempliċiment kont ħassejt li x-xandir bir-radju biss kien għadda żmienu.
Allura x’inbidel issa? Inbidel ħafna, u fl-istess waqt ma nibidel xejn.
L-akbar bidla hija l-fatt li sibt stazzjon tar-radju Malti li lest jaċċetta idea tiegħi kif inhi. Ir-Radju tal-Università, li minnu ħareġ il-Campus FM bosta snin ilu, kien stazzjon li fuqu xandart regolarment f’nofs is-snin 90 u lejn il-qalba tal-millejnu. Allura mhux xi ħaġa stramba li nħossni komdu fuq dan l-istazzjon. Ċertament li ma kontx se mmur inxandar regolarment fuq xi wieħed minn dawk l-anomalija ta’ hekk imsejħa stazzjoniijiet tal-partiti politiċi.
U Radju Malta? Ma nafx li nħossni komdu nitkellem pubblikament dwar Radju Malta. Forsi ngħid biss li dak parti mill-problema u mhux is-soluzzjoni għalija.
L-ewwel programm fis-sensiela ta’ Vjaġġi Enċiklopediċi huwa opportunità għas-semmiegħa biex jisimgħu lil missieri, Amante Sant, jitkellem dwar l-enċikolpediji f’d-dar tagħna u f’ħajtu anke qabel ma’ kienet teżisti d-dar tagħna. L-aktar parti li ħadt pjaċir nipproduċi kienet meta beda jitkellem dwar iż-Żiju Mabbli, Ammabile Mamo, wieħed mill-isbaħ imħuħ, jekk mhux l-isbaħ moħħ, fil-familja ordinarja tagħna.
Fit-tieni parti nimraħ fl-odisseja enċiklopedjana biex interraq lejn l-artiklu ta’ Wikipedia dwar dawk li tissejjaħ fatberg.
Peress li l-programm għandu joħroġ fuq ir-radju l-ewwel, għalissa mhux disponibbli online ħlief fl-istess waqt tax-xandira tal-lum it-Tlieta fil-4:30pm, jew ir-ripetizzjoni ta’ nhar il-Ħamis fit-3pm.
Eventwalment il-programm ikun disponibbli ukoll fuq l-internet fejn jinżamm arkivjat għall-futur ukoll.
Dis-sensiela hija produzzjoni tal-M3P Foundation għal Campus FM.
