Blog

Is-sensiela Mużika 21 tkompli fit-tieni staġun bit-tlieta u għoxrin programm.

PARTI 1: Diski Maltin ġodda minn Frar 2022:

PARTI 2: It-tema tal-programm tal-lum hija l-poeżiji ta’ Charles Casha mmużikati minn Mario Debono. Riċentament irċivejt dawn it-tliet kanzunetti mibnija fuq poeżiji ta’ Casha, b’mużika u kant ta’ Debono. Charles Casha mhux assoċjat wisq mal-mużika jew il-kant bil-Malti. Aktarx li l-aktar li hu magħruf huwa bħala l-kittieb tal-praspar ta’ Fra Mudest, għalkemm kiteb bosta affarijiet oħra matul is-snin.  Tajjeb insemmu però, li fl-ewwel edizzjoni ta’ dak li llum huwa l-Għanja tal-Poplu rebaħ dak il-festival bil-kanzunetta L-Warda interpretata minn Charles Azzopardi. Mario Debono ukoll għandu rabta tajba ma’ dan l-istess festival; mhux biss ħa sehem bosta drabi imma rebaħ ukoll darbtejn (1980 u 1986), l-ewwel darba bil-kanzunetta Noli li huwa wkoll isem l-album li ħareġ fl-2020 eżatt kif faqqgħet il-pandemija.

It-3 kanzunetti minn din il-kollaborazzjoni ġdida huma:

• Li Kieku Nista’
  
• La Inti Qbadt u Tlaqt
  
• Għada Malli Jisbaħ

Sib l-album Noli ta’ Mario Debono fuq Apple Music

PARTI 3: L-album ta’ llum huma żewġ albums li nħarġu separatement mill-istess grupp fl-istess ġurnata. Il-grupp huwa Lord Adder u l-albums huma Operation Pedestal u 1565. Dawn inħarġu fis-7 ta’ Frar fuq Spotify u YouTube.

Minn Operation Pedestal nisimgħu:

• Pmc
• The Gut

Tista’ tisma’ l-album Operation Pedestal ta’ Lord Adder fuq Spotify jew YouTube

Minn 1565 nisimgħu:

• Every Level
• Back to Humanity

Tista’ tisma’ l-album 1565 ta’ Lord Adder fuq Spotify jew YouTube

Mużika 21 huwa produzzjoni tal-Fondazzjoni M3P u jixxandar fuq Campus FM kull nhar ta’ Tnejn f’12:00pm u l-Ħamis fis-6:00pm.

Is-sensiela Mużika 21 tkompli fit-tieni staġun bit-tnejn u għoxrin programm.

PARTI 1: Diski Maltin ġodda fl-2022:

PARTI 2: It-tema tal-programm tal-lum hija tislima lil Chris Scicluna fil-kuntest ta’ Mużika 21. Xi jfisser dan? Chris Scicluna ħallena ftit tal-ġranet ilu, propjament fit-18 ta’ Frar 2022, dak in-nhar li kien qed tiġi ppreżentata l-edizzjoni ta’ din is-sena tal-Malta Eurovision Song Contest. Naturalment Chris, flimkien mal-mara tiegħu Moira, huma magħrufa l-aktar għas-sehem tagħhom f’dan il-konkors annwali lura mill-bidu tas-snin 90. Tant hu hekk li kull tislima lil Chris meta ħalliena, kienet talludi kważi esklussivament għal dak l-perjodu fil-karriera tiegħu, u forsi l-aktar għall-ħidma tiegħu mix-xena tal-mużika rock f’Malta qabel dan, li wasslet biex huwa jieħu sehem fil-Eurovision Song Contest. Iżda, kif jixraq fil-programmi ta’ Mużika 21, fejn nismgħu ħsejjes minn Malta tas-seklu 21, tajjeb niftakru u nisimgħu ukoll, recordings aktar riċenti ta’ Chris Scicluna.

F’din il-parti tal-programm allura nisimgħu xi siltiet mir-repertorju ta’ Chris u Moira mill-2004 u x-xogħol tagħkom flimkien mal-grupp Krave: madwar l-2014:

• What You’re Thinking (2015 radio edit)
• Flight 170 (remastered 2014)
• Moonman – minn Uncivilized (2004)
• No Turning Back – minn Uncivilized (2004)
• FiItering My Tears – minn Ninety Nights and a Monday (2014)
• Miss the Rain – minn Ninety Nights and a Monday (2014)

Sib Uncivilized (2004) fuq Apple Music u isma’ Ninety Nights and a Monday (2014) fuq Spotify

PARTI 3: L-album ta’ llum huwa l-aħħar xogħol irrekordjat ta’ Charles Gatt magħruf aħjar bħala s-City. Talking ħareġ fl-2020 hekk kif faqqgħet il-pandemija tal-Covid u minħabba f’hekk dan l-album kważi kważi ntilef, fis-sens li ma kienx hekk kunċerti jew dehriet fuq it-TV u hekk biex jiċċelebrawh.  Talking  fih ħames siltiet li huma kollha kompożizzjonijiet ta’ Charles Gatt, li jinterprethom fuq il-drums, vibes u perkussjoni oħra, flimkien ma’ Dominic Galea li jakkumpanjah fuq il-pjanu, keyboards u l-melodika. Ilum se nisimgħu 3 siltiet minnu, anke biex nfakkru lil dan il-mużiċist tassew sinifikanti Malti li miet ftit tal-ġranet ilu, fid-19 ta’ Frar 2022:

• Natural High
• Eastern Sunset
• Talking

Tista’ tisma’ l-album Talking ta’ Charles Gatt fuq Spotify.

Mużika 21 huwa produzzjoni tal-Fondazzjoni M3P u jixxandar fuq Campus FM kull nhar ta’ Tnejn f’12:00pm u l-Ħamis fis-6:00pm.

Is-sensiela Mużika 21 tkompli fit-tieni staġun bil-wieħed u għoxrin programm.

PARTI 1: Diski Maltin ġodda fi Frar tal-2022:

PARTI 2: It-tema tal-programm tal-lum hija il-mod kif jiġġebbed il-preżent.  Donnu xi wieħed mit-tensi fil-grammatika tal-mużikoloġija jew l-istorjografija. Il-preżent jirreferi għall-passat regolarment imma kultant dan isir b’mod daqs li kieku l-passat m’ilux wisq, anke meta jkunu għaddew bosta snin.  Din tema li nistgħu niġu lura għaliha aktar minn darba f’din is-sensiela, però tajjeb ngħidilkom li ħsibt ftit sew dwarha wara li sirt naf li l-grupp Malti Clandestines fil-5 ta’ Frar ta’ din is-sena ħarġu żewġ siltiet fuq Bandcamp.  Dawn iż-żewġ siltiet miġbura flimkien bħala Greenmount Sessions, u msemmija għall-istudio fejn ġew irrekordjatii f’Settembru tal-2014. Dawn kienu demos li qatt ma nħarġu fil-pubbliku qabel u allura dan huwa l-mod li jorbtu mat-tema tal-preżent imġebbed.

• Greenmount Sessions ta’ Clandestines tista’ ssibu fuq Bandcamp

Sentejn qabel il-Greenmount Sessions, il-Clandestines kien ħarġu EP flimkien mal-grupp Hey Sus! li m’għadux attiv. Ħsibt li bħala parti mill-kontemplazzjoni fuq il-preżent imġebbed nisimgħu silta’ minn Summer Camp for Pale Young Boys, l-EP tal-Clandestines u Hey Sus! u bix-xieraq li nagħżel waħda tal-Hey Sus! – Kissing Cousins.

• Summer Camp for Pale Young Boys issibuh kollu kemm hu fuq Bandcamp

PARTI 3: L-album ta’ llum huwa l-ewwel wieħed mill-2015 minn Kafena, isem użatt minn kollaborazzjoni bejn mużiċisti Maltin li tawna biss dan ix-xogħol ma’ xulxin. ll-kantawtur Daniel Cauchi, magħruf aħjar bħala l-mexxej tal-Big Band Brothers u l-mużiċist versatili Kris Spiteri ħadmu flimkien bħala Kafena biex ipproduċew l-album Lukanda Propaganda. Is-semmiegħa ta’ Mużika Mod Ieħor kienu vvutawh bħala l-album tas-sena meta ħareġ, u llum se nisimgħu 3 siltiet minnu:

• Il-Marċ t’Efrem Sammut
• Lukanda Propaganda
• It-Tfal Ma Jaħtu Qatt

Tista’ tisma’ l-album Lukanda Propoganda ta’ Kefena fuq Spotify.

Mużika 21 huwa produzzjoni tal-Fondazzjoni M3P u jixxandar fuq Campus FM kull nhar ta’ Tnejn f’12:00pm u l-Ħamis fis-6:00pm.