Blog

Is-sensiela Mużika 21 tkompli fit-tieni staġun bit-tnejn u għoxrin programm.

PARTI 1: Diski Maltin ġodda fl-2022:

 

PARTI 2: It-tema tal-programm tal-lum hija tislima lil Chris Scicluna fil-kuntest ta’ Mużika 21. Xi jfisser dan? Chris Scicluna ħallena ftit tal-ġranet ilu, propjament fit-18 ta’ Frar 2022, dak in-nhar li kien qed tiġi ppreżentata l-edizzjoni ta’ din is-sena tal-Malta Eurovision Song Contest. Naturalment Chris, flimkien mal-mara tiegħu Moira, huma magħrufa l-aktar għas-sehem tagħhom f’dan il-konkors annwali lura mill-bidu tas-snin 90. Tant hu hekk li kull tislima lil Chris meta ħalliena, kienet talludi kważi esklussivament għal dak l-perjodu fil-karriera tiegħu, u forsi l-aktar għall-ħidma tiegħu mix-xena tal-mużika rock f’Malta qabel dan, li wasslet biex huwa jieħu sehem fil-Eurovision Song Contest. Iżda, kif jixraq fil-programmi ta’ Mużika 21, fejn nismgħu ħsejjes minn Malta tas-seklu 21, tajjeb niftakru u nisimgħu ukoll, recordings aktar riċenti ta’ Chris Scicluna.

F’din il-parti tal-programm allura nisimgħu xi siltiet mir-repertorju ta’ Chris u Moira mill-2004 u x-xogħol tagħkom flimkien mal-grupp Krave: madwar l-2014:

• What You’re Thinking (2015 radio edit)
• Flight 170 (remastered 2014)
• Moonman – minn Uncivilized (2004)
• No Turning Back – minn Uncivilized (2004)
• FiItering My Tears – minn Ninety Nights and a Monday (2014)
• Miss the Rain – minn Ninety Nights and a Monday (2014)

Sib Uncivilized (2004) fuq Apple Music u isma’ Ninety Nights and a Monday (2014) fuq Spotify

PARTI 3: L-album ta’ llum huwa l-aħħar xogħol irrekordjat ta’ Charles Gatt magħruf aħjar bħala s-City. Talking ħareġ fl-2020 hekk kif faqqgħet il-pandemija tal-Covid u minħabba f’hekk dan l-album kważi kważi ntilef, fis-sens li ma kienx hekk kunċerti jew dehriet fuq it-TV u hekk biex jiċċelebrawh.  Talking  fih ħames siltiet li huma kollha kompożizzjonijiet ta’ Charles Gatt, li jinterprethom fuq il-drums, vibes u perkussjoni oħra, flimkien ma’ Dominic Galea li jakkumpanjah fuq il-pjanu, keyboards u l-melodika. Ilum se nisimgħu 3 siltiet minnu, anke biex nfakkru lil dan il-mużiċist tassew sinifikanti Malti li miet ftit tal-ġranet ilu, fid-19 ta’ Frar 2022:

• Natural High
• Eastern Sunset
• Talking

Tista’ tisma’ l-album Talking ta’ Charles Gatt fuq Spotify.

 

Mużika 21 huwa produzzjoni tal-Fondazzjoni M3P u jixxandar fuq Campus FM kull nhar ta’ Tnejn f’12:00pm u l-Ħamis fis-6:00pm.

Is-sensiela Mużika 21 tkompli fit-tieni staġun bil-wieħed u għoxrin programm.

PARTI 1: Diski Maltin ġodda fi Frar tal-2022:

 

PARTI 2: It-tema tal-programm tal-lum hija il-mod kif jiġġebbed il-preżent.  Donnu xi wieħed mit-tensi fil-grammatika tal-mużikoloġija jew l-istorjografija. Il-preżent jirreferi għall-passat regolarment imma kultant dan isir b’mod daqs li kieku l-passat m’ilux wisq, anke meta jkunu għaddew bosta snin.  Din tema li nistgħu niġu lura għaliha aktar minn darba f’din is-sensiela, però tajjeb ngħidilkom li ħsibt ftit sew dwarha wara li sirt naf li l-grupp Malti Clandestines fil-5 ta’ Frar ta’ din is-sena ħarġu żewġ siltiet fuq Bandcamp.  Dawn iż-żewġ siltiet miġbura flimkien bħala Greenmount Sessions, u msemmija għall-istudio fejn ġew irrekordjatii f’Settembru tal-2014. Dawn kienu demos li qatt ma nħarġu fil-pubbliku qabel u allura dan huwa l-mod li jorbtu mat-tema tal-preżent imġebbed.

• Greenmount Sessions ta’ Clandestines tista’ ssibu fuq Bandcamp

Sentejn qabel il-Greenmount Sessions, il-Clandestines kien ħarġu EP flimkien mal-grupp Hey Sus! li m’għadux attiv. Ħsibt li bħala parti mill-kontemplazzjoni fuq il-preżent imġebbed nisimgħu silta’ minn Summer Camp for Pale Young Boys, l-EP tal-Clandestines u Hey Sus! u bix-xieraq li nagħżel waħda tal-Hey Sus! – Kissing Cousins.

• Summer Camp for Pale Young Boys issibuh kollu kemm hu fuq Bandcamp

PARTI 3: L-album ta’ llum huwa l-ewwel wieħed mill-2015 minn Kafena, isem użatt minn kollaborazzjoni bejn mużiċisti Maltin li tawna biss dan ix-xogħol ma’ xulxin. ll-kantawtur Daniel Cauchi, magħruf aħjar bħala l-mexxej tal-Big Band Brothers u l-mużiċist versatili Kris Spiteri ħadmu flimkien bħala Kafena biex ipproduċew l-album Lukanda Propaganda. Is-semmiegħa ta’ Mużika Mod Ieħor kienu vvutawh bħala l-album tas-sena meta ħareġ, u llum se nisimgħu 3 siltiet minnu:

• Il-Marċ t’Efrem Sammut
• Lukanda Propaganda
• It-Tfal Ma Jaħtu Qatt

Tista’ tisma’ l-album Lukanda Propoganda ta’ Kefena fuq Spotify.

 

Mużika 21 huwa produzzjoni tal-Fondazzjoni M3P u jixxandar fuq Campus FM kull nhar ta’ Tnejn f’12:00pm u l-Ħamis fis-6:00pm.

Is-sensiela Mużika 21 tkompli fit-tieni staġun bl-għoxrin programm.

PARTI 1: Li fadal mid-diski li ħarġu minn Malta f’Jannar tal-2022:

 

PARTI 2: It-tema tal-programm tal-lum hija mużika mill-periferja fl-bidu tal-2022. Wara li ħarisna lejn Orami f’edizzjoni preċedenti, artist li dwaru ma naf prattikament xejn ħlief xi siltiet ta’ mużika maħruġa online, illum inħarsu lejn żewġ esponenti differenti ferm minn xulxin li, l-istess bħal Orami, ma jindaqqux fuq ir-radju f’Malta u allura effettivament jistgħu jitqiesu fil-periferija, jew fix-xifer, ta’ dak li naħsbu dwaru meta ngħidu mużika minn Malta.

Tricia Dawn Williiams – 10 Graded Piano Pieces by Maltese Composers li fih kompożizzjonijiet oriġinali għall-pjanu minn kompozituri Maltin kontemporaji li jinkludu lil Alex Vella Gregory, Ruben Zahra, Paul Portelli, Chris Muscat, Albert Garzia, u Véronique Vella. Minn dan l-EP nisimgħu:

• Sunset ta’ Reuben Pace
• One Day in November ta’ Mariella Cassar

Dan l-EP tista’ ssibu fuq Spotify.

ZenDanceProject – dan huwa proġett ibbażat fi Spanja mill-kantant David Aquilina u l-kitarrist Robert Agius, bl-involviment tal-aħwa Jimmy u John Bartolo. Ilhom attivi b’dan l-isem minn Otturbu tal-2019. Apparti hekk, ftit li xejn naf aktar dwar dan il-proġett. Mingħandhom se nisimgħu 3 siltiet riċenti:

• Vinci
• I Am the Sludge
• Light My Way

Issibuhom fuq il-Bandcamp u Spotify.

PARTI 3: L-album ta’ llum huwa l-ewwel wieħed mill-2022 mill-kantawtur prolifiku Malti-Awstraljan Andre Camilleri li jismu The Only Way Is Up. Id-disinn tal-qoxra ta’ dan l-album hija ta’ Lucinda Camilleri. Għalkemm għadu ma ħabbarx albums oħra għall-2022, huwa mistenni li Andre Camillerii joħroġ aktar diski matul din is-sena.  Intant nisimgħu erba’ siltiet minnu:

• Let the Rain Come Down
• I Made Up My Mind
• Back to Square One
• Too Little Too Late

Tista’ tisma’ l-album The Only Way Is Up ta’ Andre Camilleri fuq Bandcamp.

 

Mużika 21 huwa produzzjoni tal-Fondazzjoni M3P u jixxandar fuq Campus FM kull nhar ta’ Tnejn f’12:00pm u l-Ħamis fis-6:00pm.